1. Ümumi müddəalar

Bu Məxfilik Siyasəti "e-Bələdiyyə" portalından istifadə edən şəxslərin fərdi məlumatlarının toplanılması, işlənilməsi, saxlanılması, mühafizəsi və qanunvericiliklə müəyyən edilmiş hallarda ötürülməsi qaydalarını müəyyən edir.

"e-Bələdiyyə" portalı bələdiyyələrin yerli vergi ödəyiciləri ilə münasibətlərinin rəqəmsallaşdırılması, yerli vergilər və ödənişlər üzrə öhdəliklərin izlənilməsi, elektron müraciətlərin göndərilməsi, bildirişlərin təqdim edilməsi, yerli vergi borclarının hesablanması və ödənişlərin elektron qaydada həyata keçirilməsi məqsədilə yaradılmış rəqəmsal platformadır.

Portal Bələdiyyələrin Vahid İnformasiya Sisteminin alt sistemi kimi fəaliyyət göstərir və bələdiyyə idarəçiliyində şəffaflığın, operativliyin, məlumatların dəqiqliyinin və vətəndaşlarla qarşılıqlı əlaqənin gücləndirilməsinə xidmət edir.

Bu Siyasət Azərbaycan Respublikasının qüvvədə olan qanunvericiliyinə, o cümlədən fərdi məlumatların mühafizəsi, informasiya sistemləri, elektron sənəd və elektron imza ilə bağlı normativ hüquqi aktların tələblərinə uyğun olaraq hazırlanmışdır.

2. Operator barədə məlumat

Portalın operatoru Azərbaycan Şəhər, Qəsəbə və Kənd Bələdiyyələrinin Milli Assosiasiyaları tərəfindən təsis edilmiş "Bələdiyyələrin Rəqəmsallaşma və İnnovasiya Mərkəzi" QSC-dir.

Operatorun əlaqə məlumatları:
Ünvan: Bakı şəhəri, Nərimanov rayonu, Sabit Rəhman küçəsi 53A
Telefon: 012 565 75 71
Elektron poçt: info@e-belediyye.gov.az

Operator portalın texniki və təşkilati idarə olunmasını, məlumatların təhlükəsizliyinin təmin edilməsini, istifadəçi müraciətlərinin qəbulunu və portalın fəaliyyətinin davamlılığını təmin edir.

3. Toplanan fərdi məlumatlar

Portalın funksional imkanlarından istifadə zamanı istifadəçilər barədə aşağıdakı fərdi məlumatlar toplana və işlənilə bilər:

1. ad, soyad və ata adı;
2. fərdi identifikasiya nömrəsi;
3. əlaqə nömrəsi;
4. istifadəçinin bələdiyyə üzrə öhdəliklərinə dair məlumatlar;
5. yerli vergi və ödəniş obyektləri üzrə məlumatlar;
6. ödəniş məlumatları;
7. müraciət, təklif və sorğular üzrə təqdim edilən məlumatlar;
8. bildiriş və məlumatlandırma tarixçəsi;
9. portalda aparılan əməliyyatlara dair elektron qeydlər;
10. informasiya təhlükəsizliyinin təmin edilməsi üçün zəruri olan texniki məlumatlar.

Texniki məlumatlara istifadəçinin portala giriş tarixi və vaxtı, IP ünvanı, əməliyyatlar üzrə audit qeydləri, istifadə edilən cihaz və brauzer barədə ümumi texniki göstəricilər daxil ola bilər. Bu məlumatlar portalın təhlükəsizliyinin təmin edilməsi, nasazlıqların araşdırılması və qanunsuz müdaxilələrin qarşısının alınması məqsədilə istifadə olunur.

4. Fərdi məlumatların mənbələri

İstifadəçilərə dair məlumatlar aşağıdakı mənbələrdən əldə oluna bilər:

1. istifadəçinin portalda özü tərəfindən daxil etdiyi məlumatlar;
2. bələdiyyələr tərəfindən daxil edilən və ya təsdiq edilən məlumatlar;
3. Bələdiyyələrin Vahid İnformasiya Sistemi;
4. Elektron Hökumət İnformasiya Sistemi;
5. gücləndirilmiş elektron identifikasiya və elektron imza vasitələri;
6. Hökumət Ödəniş Portalı vasitəsilə həyata keçirilən ödənişlərə dair məlumatlar;
7. qanunvericiliyə uyğun inteqrasiya edilmiş digər dövlət informasiya ehtiyatları və sistemləri.

Portalda istifadəçinin şəxsiyyəti ASAN Login, SİMA, elektron imza və ya digər gücləndirilmiş elektron identifikasiya vasitələri ilə müəyyən edilə bilər.

5. Fərdi məlumatların işlənilmə məqsədləri

Toplanan fərdi məlumatlar aşağıdakı məqsədlər üçün işlənilir:

1. istifadəçinin portalda identifikasiyası və autentifikasiyası;
2. istifadəçinin aid olduğu bələdiyyə üzrə öhdəliklərinin müəyyən edilməsi;
3. yerli vergilər və ödənişlər üzrə məlumatların təqdim edilməsi;
4. bələdiyyə tərəfindən hesablanmış tədiyə bildirişlərinin istifadəçiyə elektron qaydada təqdim edilməsi;
5. yerli vergi və ödənişlərin hesablanması və ödənilməsi;
6. istifadəçinin müraciət, təklif və sorğularının qəbul edilməsi və cavablandırılması;
7. ödəniş əməliyyatlarının icrası və təsdiqedici məlumatların formalaşdırılması;
8. istifadəçiyə öhdəliklər, yeniliklər, bildirişlər və digər vacib məlumatlar barədə məlumat verilməsi;
9. bələdiyyə idarəçiliyində şəffaflığın və hesabatlılığın təmin edilməsi;
10. elektron arxiv və əməliyyat tarixçəsinin aparılması;
11. informasiya təhlükəsizliyinin təmin edilməsi;
12. qanunvericiliklə müəyyən edilmiş digər vəzifələrin icrası.

Fərdi məlumatlar yalnız portalın fəaliyyət məqsədləri, bələdiyyə xidməti və qanunvericiliklə müəyyən edilmiş səlahiyyətlərin icrası çərçivəsində istifadə edilir.

6. Məlumatların üçüncü şəxslərə ötürülməsi

İstifadəçilərə dair fərdi məlumatlar yalnız qanunvericiliklə icazə verilən hallarda və zəruri həcmdə aşağıdakı subyektlərə ötürülə bilər:

1. aidiyyəti bələdiyyələrə;
2. Bələdiyyələrin Vahid İnformasiya Sisteminin səlahiyyətli iştirakçılarına;
3. Elektron Hökumət İnformasiya Sistemi vasitəsilə inteqrasiya olunan dövlət informasiya ehtiyatlarına və sistemlərinə;
4. Hökumət Ödəniş Portalı və ödəniş əməliyyatlarında iştirak edən səlahiyyətli qurumlara;
5. qanunvericiliklə tələb edildikdə məhkəmə, hüquq-mühafizə, nəzarət və digər səlahiyyətli dövlət orqanlarına;
6. portalın texniki dəstəyi, təhlükəsizliyi və istismarı ilə bağlı müqavilə əsasında cəlb edilmiş xidmət təminatçılarına.

Məlumatlar üçüncü şəxslərə yalnız qanuni əsas olduqda, portalın funksionallığının təmin edilməsi üçün zəruri həddə və məlumatların mühafizəsi tələblərinə riayət edilməklə təqdim edilir.

7. Ödəniş məlumatları

Portal vasitəsilə yerli vergilər və ödənişlərin elektron qaydada həyata keçirilməsi Hökumət Ödəniş Portalı üzərindən təmin edilir.

Bank kartı və digər ödəniş alətlərinə dair həssas rekvizitlərin saxlanılması portalın funksional məqsədlərinə daxil deyildir. Ödəniş əməliyyatları ödəniş infrastrukturunun səlahiyyətli iştirakçıları vasitəsilə həyata keçirilir.

Portalda ödənişin nəticəsi, əməliyyatın statusu, ödəniş məbləği, tarix və digər təsdiqedici məlumatlar istifadəçinin ödəniş tarixçəsinin və bələdiyyə öhdəlikləri üzrə uçotun aparılması məqsədilə saxlanıla bilər.

8. Məlumatların saxlanılması

İstifadəçilərə dair məlumatlar qanunvericiliklə, bələdiyyə uçotu, maliyyə hesabatlılığı, elektron arxivləşdirmə və portalın fəaliyyət məqsədləri ilə tələb olunan müddət ərzində saxlanılır.

Bələdiyyə fəaliyyəti ilə bağlı əməliyyat, müraciət, bildiriş, ödəniş və öhdəlik məlumatları uzunmüddətli uçot və arxiv məqsədləri üçün saxlanıla bilər.

Məlumatlardan yalnız bələdiyyə fəaliyyəti, yerli vergilər və ödənişlər üzrə uçot, istifadəçi müraciətlərinin cavablandırılması, qanunvericiliklə müəyyən edilmiş hesabatlılıq və informasiya təhlükəsizliyi məqsədləri üçün istifadə olunur.

9. Məlumatların mühafizəsi

Operator fərdi məlumatların mühafizəsi üçün təşkilati və texniki təhlükəsizlik tədbirləri həyata keçirir. Bu tədbirlərə aşağıdakılar daxil ola bilər:

1. istifadəçilərin gücləndirilmiş elektron identifikasiya vasitələri ilə tanınması;
2. səlahiyyətlərə əsaslanan giriş hüquqlarının tətbiqi;
3. sistem əməliyyatları üzrə audit qeydlərinin aparılması;
4. məlumatlara icazəsiz çıxışın qarşısının alınması;
5. texniki təhlükəsizlik tədbirlərinin tətbiqi;
6. ehtiyat nüsxələmə və bərpa mexanizmlərinin təşkili;
7. informasiya təhlükəsizliyi insidentlərinin araşdırılması və qarşısının alınması.

Bələdiyyə əməkdaşları və digər səlahiyyətli şəxslər portalda əldə etdikləri məlumatlardan yalnız xidməti vəzifələri və səlahiyyətləri çərçivəsində istifadə etməlidirlər.

10. İstifadəçinin hüquqları

İstifadəçi qanunvericiliklə müəyyən edilmiş qaydada aşağıdakı hüquqlara malikdir:

1. özü barədə portalda işlənilən məlumatlarla tanış olmaq;
2. yanlış və ya natamam məlumatların dəqiqləşdirilməsini tələb etmək;
3. portal vasitəsilə təqdim etdiyi müraciət və təkliflərin statusu barədə məlumat almaq;
4. fərdi məlumatlarının qanunsuz işlənilməsi ilə bağlı operatora müraciət etmək;
5. qanunvericiliklə müəyyən edilmiş hallarda aidiyyəti dövlət orqanlarına şikayət vermək;
6. portalın istifadəsi və məlumatların işlənilməsi ilə bağlı izah almaq.

İstifadəçi bu hüquqların həyata keçirilməsi üçün operatorun əlaqə vasitələri üzərindən müraciət edə bilər.

11. Bildirişlər və məlumatlandırma

Portal istifadəçilərə öhdəliklər, yerli vergi borcları, tədiyə bildirişləri, ödəniş statusları, yeniliklər, müraciət cavabları və digər vacib məlumatlar barədə bildirişlər göndərə bilər.

Bildirişlər istifadəçinin portal kabinetində, elektron poçt, mobil nömrə və ya digər elektron rabitə vasitələri ilə təqdim oluna bilər.

12. Məxfilik siyasətində dəyişikliklər

Operator bu Məxfilik Siyasətində qanunvericilikdə, portalın funksionallığında və ya məlumatların işlənilməsi qaydalarında baş verən dəyişikliklərlə əlaqədar yeniliklər edə bilər.

Dəyişikliklər portalda yerləşdirildiyi tarixdən qüvvəyə minir. İstifadəçinin portaldan istifadəni davam etdirməsi yenilənmiş Məxfilik Siyasəti ilə tanış olması kimi qəbul edilə bilər.

13. Əlaqə

Məxfilik, fərdi məlumatların işlənilməsi, portalın istifadəsi və istifadəçi hüquqları ilə bağlı müraciətlər aşağıdakı əlaqə vasitələri ilə təqdim edilə bilər:

"Bələdiyyələrin Rəqəmsallaşma və İnnovasiya Mərkəzi" QSC
Ünvan: Bakı şəhəri, Nərimanov rayonu, Sabit Rəhman küçəsi 53A
Telefon: 012 565 75 71
Elektron poçt: info@e-belediyye.gov.az